የክቡር አቶ ሙስጠፌ ሙሐመድ የሜዳሊያና የዕውቅና ሽልማት

ባሕር ዳር ዩኒቨርሲቲ ለክቡር አቶ ሙስጠፌ ሙሐመድ ኦመር ያዘጋጀውን የሜዳሊያና የዕውቅና ሽልማት  አበረከተ፡፡ 

----------------------------------------------------------------------------------------------------------------------------------

የባሕር ዳር ዩኒቨርሲቲ ሴኔት በ2011ዓ.ም. ባካሔድው የተማሪዎች የምረቃ ስነ-ስርዓት  ላይ  በእንግድነት የተገኙትን የሶማሌ ብሔራዊ ክልላዊ መንግስት ምክትል ርዕሰ-መስተዳድር  ክቡር  አቶ  ሙስጠፌ  ሙሐመድ  ኦመር የዓመቱ ‘ተስፋ የተጣለበት መሪ’ በሚል ዘርፍ የክብር ሜዳሊያ እንዲሰጣቸው በአንድ ድምፅ መወሰኑ ይታወሳል፡፡ ይሁን እንጂ በተለያዩ አጋጣሚዎች በተፈጠሩ አለመመቻቸቶች ምክንያት በወቅቱ ዩኒቨርሲቲው ለክቡር አቶ ሙስጠፌ ሙሐመድ ኦመር ሊያበረክት ያዘጋጀውን የሜዳሊያና የዕውቅና ሽልማት ማድረስ ያልተቻለ ሲሆን በዛሬው ዕለት የባሕር ዳር ዩኒቨርሲቲ አመራር በጂግጂጋ ዩኒቨርሲቲ የተማሪዎች ምረቃ ስነ-ስርዓት  ላይ  በመገኘት  በዩኒቨርሲቲው ፕሬዚዳንት ዶ/ር ፍሬው ተገኝ አማካይነት የሜዳሊያና የዕውቅና ሽልማቱን አበርክቷል፡፡ በምረቃ 

ስነ-ስርዓቱ  ላይ በመገኘት  ሽልማቱን  የተረከቡት  ክቡር  አቶ  ሙስጠፌ ሙሐመድ ኦመር  የተሰማቸውን ደስታ  የገለፁ ሲሆን ዶ/ር ፍሬው ተገኝ በበኩላቸው የሽልማት መርሐ-ግብሩ ዘግይቶ የተካሄደበትን ምክንያት አብራርተው  ክቡር አቶ ሙስጠፌ ሙሐመድ ኦመር ከክልላቸው ባለፈ ለአገራችን ኢትዮጵያ በምሳሌነት እያከናወኗቸው ላሉት ተግባራት ምስጋናቸውንና አድናቆታቸውን ገልፀዋል፡፡ ዶ/ር ፍሬው አክለውም ባሕር ዳር ዩኒቨርሲቲና ጅግጅጋ ዩኒቨርሲቲ ኢንፎርሜሽን ኮሚዩኒኬሽን ቴክኖሎጂን እና አደጋ መከላከልና ዝግጁነትን ጨምሮ በጋራ እየሰሯቸው ስላሉ የትብብር ስራዎች አብራርተዋል፡፡ በተጨማሪም በአገር-አቀፍ ደረጃ ከፀደቀው  የትምሕርትና ስልጠና ፍኖተ-ካርታ ጋር በሚጣጣም መልኩ የሶማልኛ ቋንቋ በባሕር ዳር  ዩኒቨርሲቲ ውስጥ  ቢሰጥ ስለሚኖረው ፋይዳና ይህንንም ለማስጀመር ስለሚቻልበት አግባብ አውስተዋል፡፡ ዩኒቨርሲቲው ከዚህ በፊት በተማሳሳይ የኦሮምኛ ቋንቋ ትምህርትን ያስጀመረ ሲሆን እንደሶማልኛ ቋንቋ ሁሉ ሌሎች አገር-በቀል  ቋንቋዎችን  በቀጣይ የማስከፈት ግቡ አንድ አካል ይሆናል፡፡  የባሕር ዳር ዩኒቨርሲቲ በዛሬው ዕለት  ከጅግጅጋ ዩኒቨርሲቲ በተለያዩ መርሐ-ግብሮች ትምሕርታቸውን አጠቀናው ለምረቃ ለበቁ የ2012ዓ.ም.  ተመራቂዎችና ለቤተሰቦቻቸው እንኳን ደስ አላችሁ (Hambalyo) ይላል፡፡